MERKEZI AZIÝANYŇ GULÇULYKDAKY RAÝATLARY

Adam söwdasy boýunça global maglumat merkeziniň hasabatyna görä, 2005-2021 ýyllar aralygynda Merkezi Aziýanyň 6000-den gowrak raýaty jynsy, zähmet ýa-da başga görnüşli gulçulyga sezewar bolýarlar. Bularyň hem 525 sanysynyň Türkmenistanyň raýatlarydygy bellenilýär. Gulçulykdaky türkmenistanlylaryň 54%-i Türkiýede ýaşaýar we olaryň hem 60%-ne golaýyny aýallar düzýär.

"Alternativa" hereketiniň psihology Anna Nastiçenkonyň aýtmagyna görä, adam söwdasyny edýänler seni azatlykdan mahrum etmän, mekir hereket edýärler. Olar "Türmä düşersiň", "Jynsy gatnaşykly wideolaryňy garyndaşlaryňa ibererin", "Garyndaşlaryňy öldürerin" ýaly haýbatlar bilen pidalary islendik zat etmäge razy edýärler. Nastiçenkonyň pikiriçe, şeýle wakalardan has köp adamyň habarly bolmagy üçin psihologlaryň sanyny köpeltmeli we ilat bilen tegelek stol söhbetdeşlikleri geçirmeli. GDA ýurtlarynyň aýallary beýleki adamlaryň tankytlaýanlygy zerarly köplenç hakykaty ýaşyrmaga synanyşýarlar.

2005-nji ýylda Halkara Migrasiýa Guramasy adam söwdasyna garşy göreşmek we jynsy gulçulyga sezewar bolan aýallara kömek etmek üçin Türkiýede 157 nomerli gyzgyn liniýa açdy. Halkara Zähmet Guramasyna görä, gulçulykdan ýylda takmynan 150 milliard dollar global girdeji alynýar we 40 milliona golaý adam adam söwdasynyň pidasy bolýar.

Çeşme